Mbyllen vendvotimet në Serbi, ka nisur procesi i numërimit të votave

Në orën 20:00 janë mbyllur të gjitha vendvotimet në Serbi, ku gjatë ditës së sotme qytetarët iu drejtuan kutive të votimit për zgjedhjet e parakohshme parlamentare. Ky proces zgjedhor është zhvilluar në të gjitha komunat, përfshirë edhe ato të Luginës së Preshevës, si Presheva, Bujanoci dhe Medvegja.

Sipas informacioneve të përcjella nga Presheva.AL, procesi i numërimit të votave ka filluar menjëherë pas mbylljes së qendrave të votimit. Autoritetet zgjedhore kanë bërë të ditur se qytetarët të cilët ndodheshin në radhë në momentin e mbylljes së vendvotimeve kanë pasur të drejtën ligjore për të ushtruar votën e tyre deri në përfundim të radhës.

Gjatë ditës, procesi është karakterizuar nga një pjesëmarrje e lartë e votuesve. Votuesit është dashur që për identifikim të përdorin letërnjoftimin ose pasaportën e vlefshme për të marrë pjesë në këto zgjedhje.

Vlerësimet paraprake mbi pjesëmarrjen dhe rrjedhën e procesit deri në mbyllje janë ndjekur nga organizatat monitoruese CeSID dhe Ipsos. Ndërkohë, pritet që rezultatet preliminare të fillojnë të publikohen nga organet kompetente zgjedhore në orët në vijim, pasi të përfundojë procesi i numërimit në të gjitha njësitë zgjedhore.