Policia e trafikut në Serbi përdor dronë për monitorimin e shkeljeve në rrugë

Policia e trafikut në Serbi ka prezantuar një risi në punën e saj operative përmes përdorimit të dronëve për mbikëqyrjen e pjesëmarrësve në trafik. Siç raporton transmetuesi publik RTS, ky mjet i ri teknologjik synon të identifikojë shkeljet që shpesh shpëtojnë nga monitorimi klasik i patrullave në terren.

Milan Maliçeviq nga Administrata e Policisë së Trafikut, në një deklaratë për RTS, ka shpjeguar se dronët janë të pajisur me kamera të rezolucionit të lartë. Kjo teknologji mundëson që autoritetet të kapin në kohë reale një gamë të gjerë të kundërvajtjeve.

Sipas policisë, dronët janë në gjendje të dokumentojnë shkelje si: mosvendosja e rripit të sigurimit, përdorimi i telefonit gjatë ngasjes, parakalimi në vijë të plotë, si dhe lloje të ndryshme të drejtimit të dhunshëm të automjetit.

Këto pajisje përfaqësojnë një hap përpara në strategjinë e policisë për të shtuar kontrollin në akset rrugore më problematike. Përdorimi i kamerave ajrore lejon një vëzhgim më të gjerë të zonës ku kryhet kontrolli, duke minimizuar mundësinë e shmangies së sanksioneve nga ana e shoferëve që bëjnë shkelje.

Autoritetet theksojnë se ky mjet do të shërbejë si mbështetje shtesë për patrullat, me qëllim kryesor rritjen e sigurisë në komunikacion dhe ndërgjegjësimin e qytetarëve për respektimin e rregullave të qarkullimit rrugor.